Starfsfólkið eignast fyrirtækin - ekki fyrrverandi eigendur

Lilja Mósesdóttir, þingmaður VG og formaður viðskiptanefndar, vill að starfsfólki fyrirtækja sem bankarnir hafa leyst til sín verði gefinn kostur á að eignast þau í stað fyrrverandi eigenda sem oftar en ekki komi ekki inn með eigið fé í reksturinn. Hún telur brýnt að settar verði meginreglur um markmið með skuldbreytingum fyrirtækja og heimila. Rætt var við Lilju í þættinum Í bítið á Bylgjunni fyrr í morgun.

Lilja sagðist vera óánægð með Arion banka þegar kemur að málefnum eignarhaldsfélagsins Haga sem meðal annars rekur verslanirnar Bónus, 10-11 og Hagkaup. Bankinn heldur nú utan um 98 prósenta hlut í Högum en 2 prósent eru í eigu stjórnendanna. Almenningi og fagfjárfestum mun standa til boða að kaupa hluti í félaginu. Núverandi stjórnendum Haga býðst forkaupsréttur að 15% hlut og þar af Jóhannesi Jónssyni allt að 10% hlut á sama gengi og öðrum fjárfestum.

„Þessi aðgerð hefur orðið til þess að ég vill að við stjórnarliðar setjum meginreglur um dreift eignarhald," sagði Lilja en hún vill einnig að starfsfólkið fái tækifæri til að eignast fyrirtækin.

„Starfsfólkið hefur tekið á sig launalækkanir og þessir eigendur eru oft á tíðum ekki að koma inn með nýtt eigið fé. Þeir fá jafnvel að halda fyrirtækjunum þó svo að þeir komi ekki inn með eigið fé því þeir eru taldir svo mikilvægir fyrir reksturinn. Í mörgum fyrirtækjum er starfsfólkið mikilvægara heldur en eigendurnir," sagði Lilja.

Hægt er að hlusa á þáttinn hér.