Hóta að beita hernum

Norður-Kóreumenn hóta að beita hervaldi ákveði Öryggisráð Sameinuðu þjóðanna að refsa þeim fyrir að sökkva herskipi sunnanmanna fyrr á þessu ári.

Alþjóðleg rannsókn leiddi í ljós að Norður-Kóreumenn sökktu 1200 tonna herskipi Suður-Kóreumanna sem kostaði 46 manns lífið í lok mars. Norðanmenn hafa allatíð neitað þessu og fullyrt að um uppspuna sé að ræða. Í síðasta mánuði færðist aukin spenna í samskipti ríkjanna og hefur viðskipta- og stjórnmálasamskiptum verið slitið og þá hafa hermenn verið settir í viðbragðsstöðu.

Öryggisráð Sameinuðu þjóðanna fjallar nú deiluna en bæði ríkin hafa lagt fram gögn máli sínu til stuðnings. Ráðið hvatti deiluaðila í gær til að slíðra sverðin og grípa ekki til aðgerða sem komi til með að stigmagna deiluna.

Í kjölfarið boðaði Sin Son-ho, sendiherra Norður-Kóreu hjá Sameinuðu þjóðunum, til blaðamannafundar í New York og sagði að yfirvöld í Norður-Kóreu komi ekki til með að taka því þegjandi ákveði Öryggisráðið að beita norðanmenn refsingum. Hann sagði að yfirvöld í Norður-Kóreu gætu þess í stað gripið til vopna og beitt hernum.