Til heiðurs Cohen

Aðrir tónleikarnir á skömmum tíma til heiðurs kanadíska söngvaskáldinu Leonard Cohen verða haldnir á Rosenberg í kvöld.

Stutt er síðan Valur Gunnars­son söng lög hans í íslenskum þýðingum en núna ætla þær Esther Jökulsdóttir, Soffía Karlsdóttir og Lára Sveinsdóttir úr leikritinu Söngvaseið að spreyta sig á lögum hans ásamt söngkonunni Þórunni Antoníu Magnúsdóttur. Í þetta sinn verður sungið á ensku.

„Soffía var búin að ganga með þessa flugu í höfðinu í mörg ár. Við hlustum allar á Cohen, bara mismikið og svo kom Þórunn inn í þetta líka,“ segir Esther. „Þannig að við létum verða af þessu og ákváðum að taka lögin sem okkur finnst skemmtilegust.“

Esther vonast til að fleiri tónleikar verði haldnir í framhaldi af þessum og lofar góðri skemmtun á Rosenberg í kvöld. - fb