Ögmundur: Svíar handrukkarar Breta og Hollendinga

Þingmaður Vinstir grænna, Ögmundur Jónasson, er harðorður í garð Svía eftir viðtal Reuters við forsætisráðherra Svía, Fredrik Reinfeldt, sem Vísir birti meðal annars í gær. Í bloggfærslu á heimsíðu sinni segir Ögmundur:

„Skyldu Svíar skilja að Íslendingar véfengja greiðsluskyldu sína? Skyldu Svíar sklija að greiðsluskilmálarnir eru ósvífin þvingunarúrræði? Skyldu Svíar skilja að þeir eru orðnir handrukkarar Breta og Hollendinga?"

Tilefnið eru ummæli Reinfeldt þar sem hann sagði að Svíar muni ekki lána Íslendingum fyrr en Alþjóðagjaldeyrissjóðurinn (AGS) gefi grænt ljós á endurskoðun efnahagsáætlunar á Íslandi.

Reinfeldt sagði í viðtali við Reuters: „Við viljum að Ísland haldi sig við þessar alþjóðlegu skuldbindingar og í kjölfarið munum við standa við okkar loforð."

Ögmundi blöskrar þessi ummæli sem og yfirlýsingu framkvæmdarstjóra AGS, Domnique Strauss-Kahn, þar sem hann sagði þrýsting frá alþjóðasamfélaginu að Ísland klári Icesave skuldbindingar sínar verði til þess að AGS þurfi að fresta endurskoðun sinni.

Ögmundur er þó sárreiðastur Svíum og skrifar á bloggið sitt:

„Kannski finnst Reinfeldt forsætisráðherra það vera í góðu lagi að gerast handrukkari. En hvað skyldi sænsku þjóðinni finnast um þetta nýja hlutverk sitt? Hvað skyldi þjóðinni sem átti Olov Palme finnast um að vera komin í fótgöngulið fjármagnsins gegn fólkinu? Skyldu menn almennt átta sig á því að viðhorfsbreytingin í Evrópu á meðal almennings er vegna þess að fólk er farið að stilla dæminu svona upp: Annars vegar hinir eignalausu. Hins vegar þeir sem töpuðu innistæðum sínum. Almennt finnst fólki ekki sjálfgefið að hinir eignalausu, eða þeir sem eru lasburða og þurfa á velferðarþjónustu að halda, verði látnir blæða til að hinir missi ekki spón úr aski."

Athygli vekur að Ögmundur kýs að myndskreyta færslu sína með vígalegum vélhjólamönnum. Færsluna má lesa í heild sinni hér.