Bændur vilja halda í landbúnaðarráðuneytið

Stjórn Landssamtaka sauðfjárbænda mótmælir fyrirætlan ríkisstjórnarinnar um að leggja af sjávarútvegs- og landbúnaðarráðuneytið.  

Víðtæk og eindregin andstaða hefur ítrekað komið fram við málið frá þeim sem starfa innan landbúnaðar- og sjávarútvegs, en ríkisstjórnin kýs að hafa það að engu, segir í tilkynningu frá samtökunum.

Margoft hefur verið bent á rökin fyrir þessari afstöðu m.a. reynsluna af fyrri sameiningu, vaxandi mikilvægi þessara atvinnugreina og viðkvæma stöðu þeirra vegna aðildarviðræðna við ESB. En á það er ekki hlustað.

Samtökin hljóta að spyrja sig hvort að það sé beinlínis stefna ríkisstjórnarinnar að valda þessum grunnatvinnuvegum íslenskrar þjóðar tjóni.

 

Mikil er skömm þeirrar ríkisstjórnar sem telur sig vera málsvara landsins alls ef hún ætlar að þröngva málinu í gegn í blóra við vilja þessara atvinnugreina, segir í tilkynningunni.

Stjórn LS vonast enn til þess að mál þetta verði tekið af dagskrá og ríkisstjórnin snúi sér að mikilvægari málum.