Hvergi alvarlegt tjón

Þrátt fyrir mörg foktilvik, varð hvergi alvarlegt tjón og engan sakaði í suðaustanstormi, sem brast á sunnan- og suðvestan til á landinu í nótt og morgun. Enn er illviðri á Vestfjörðum.

Veðrið brast fyrst á í Vestmannaeyjum í gærkvöldi, síðan á Suðurlandi og á höfuðborgarsvæðinu upp úr klukkan fjögur í nótt.

Lögreglunni á höfuðborgarsvæðinu bárust fjöl margar tilkynningar um fok og voru björgunarsveitir kallaðar út til aðstoðar. Meðal annars fauk mannlaus bíll um koll og ljósastaur féll á Suðurgötuna og lokaði henni. Eitthvað var um fok á Suðurnesjum, en ekki þurfti að kalla út björgunarsveitir þar.

Veðrið gekk hratt yfir eins og spáð hafði veðrið og var farið að hægja í Eyjum fljótlega upp úr miðnætti. Í morgun gekk það líka niður á höfuðborgarsvæðinu og á Vesturlandi, en Vegagerðin varar enn við óveðri á heiðum á Vesturlandi, þar sem veðrið er að ganga yfir. Það fer líka eitthvað versnandi á Norðurlandi, einkum vestanverðu. Spáð er að hiti fari sumstaðar yfir tíu stig á landinu í dag.