Hollywood horfir til Reykjavíkur

Að minnsta kosti þrjár kvikmyndir eru á teikniborðum virtra Hollywood-leikstjóra sem fjalla um atburði nátengda íslenskri sögu. Tvær kvikmyndir eru sagðar vera í undirbúningi um líf og starf hins íslensk/bandaríska skákundurs Bobby Fischer.

David Fincher, leikstjóri Seven, Zodiac og The Game, er sagður vera með sögulega kvikmynd um Fischer í bígerð og New York Magazine greindi frá því að Tobey Maguire, Köngulóarmaðurinn sjálfur, hefði tekið að sér hlutverk Bobbys í myndinni.

Fincher er ekki sá eini sem vill kvikmynda ævi Fischers því breski leikstjórinn Kevin Macdonal er einnig með á teikniborðinu mynd um Bobby Fischer. Henni hefur verið gefið nafnið Bobby Fischer Goes to War og er hugmyndin sú að einblína aðallega á hið sögulega einvígi Fischers og Spasskís í Reykjavík 1972.

Ein mynd hefur þegar verið gerð um Bobby Fischer og einvígið í Reykjavík. Hún heitir Bobby Fischer Live og var frumsýnd í Bandaríkjunum í október á síðasta ári. Myndin skartar engum stórstjörnum í aðalhlutverkum en leikstjórinn heitir Damian Chapa og vakti hann mikla athygli fyrir kvikmynd sína um pólska leikstjórann Roman Polanski þar sem kynferðisbrotamál hans var í aðalhlutverki. Þegar leikaralisti Fischers-myndarinnar er skoðaður kemur í ljós að einhverjir fá að leika íslensk hlutverk þótt enginn Sæmi rokk sé nefndur á nafn.

En skákeinvígið er ekki eini sögulegi atburðurinn sem kvikmyndagerðarmenn frá Hollywood hafa sýnt áhuga á. Því eins og komið hefur fram í fjölmiðlum er Ridley Scott áhugasamur um að gera kvikmynd um leiðtogafund Ronalds Reagan og Mikhaíls Gorbatsjof í Höfða árið 1986. Það verkefni er þó á algjöru byrjunarstigi, rétt eins og hinar myndirnar tvær. - fgg