Tæklar næst ítalskar kynlífskómedíur

Baker hefur leikstýrt átta kvikmyndum á síðustu 25 árum og fjallar hann nær yfirleitt um fólk sem er utangarðs, oftar en ekki fólk tengt kynlífsverkaiðnaðinum. Myndir hans innihalda gjarnan óreynda leikara, raunsæisleg samtöl og hráan tökustíl.

Sjá einnig: Strípibúlluást sem hleypir öllu í háaloft

Eftir að Anora (2024), sem fjallaði um ástarævintýri samnefndrar fatafellu, rakaði inn verðlaunum á nær öllum verðlaunahátíðum síðasta árs hefur bransinn beðið eftir fréttum af næstu mynd Baker. Þrátt fyrir tilboð frá öllum helstu stúdíóunum hefur Baker ákveðið að framleiða næstu kvikmynd sína sjálfstætt.

Baker er þessa dagana staddur á kvikmyndahátíðinni í Berlín og ræddi þar við Variety um nýjustu stuttmynd sína, Sandiwara (2026) með Michelle Yeoh í aðalhlutverki, og næstu skref á ferlinum. Kom þar í ljós að næsta mynd hans verður tekin upp á Ítalíu og að ítalska leikkona Vera Gemma muni leika í henni.

„Þetta er ástarbréf mitt til ítölsku kynlífskómedía sjöunda og áttunda áratugarins svo ég hef verið að sökkva mér ofan í það. Við viljum taka hana upp í ár,“ sagði Baker við Variety.

Ítalska kynlífskómedían, sexy all'italiana á frummálinu, er undirgrein ítölsku gamanmyndarinnar (ít. commedia all'italiana) sem fæddist á sjötta áratug síðasta aldar. Kynlífskómedían einkenndist af mikilli nekt og ærslafengnum gamanleik. Uppgangur greinarinnar tengdist kynlífsbyltingunni sterkum böndum og var laus við samfélagskrítíkina sem einkenndi ítalskar myndir þess tíma. Forvitnilegt verður að sjá hvernig Baker tekst til.