Rörasprengja sprakk í höndum mannsins

Rörasprengjur fundust nærri staðnum í Hveragerði þar sem maður á þrítugsaldri slasaðist alvarlega á níunda tímanum eftir að eins slík sprakk, að því er virðist í höndunum hans.

Maðurinn var fluttur á spítala með þyrlu landhelgisgæslunnar lífshættulega slasaður.

Lögreglan á Selfossi er enn á staðnum og rannsakar vettvang og tildrög slyssins. Þar fundust rörasprengjur.

Sprengjusérfræðingur sérsveitar Ríkislögreglustjóra var fenginn á staðinn til að tryggja að ekki stafi hætta af leyfum flugelda eða annarra eldfimra efna á vettvangi.

Ekki hafa borist nánari fregnir af líðan mannsins á þessari stundu. Annar maður, sem var á vettvangi, var fluttur á Heilbrigðisstofnun Suðurlands á Selfossi til aðhlynningar. Hann er reyndist vera óslasaður. Hann er 21 árs.