Þurfa að skilja eigin ábyrgð

Stjórnarmenn í fjármálafyrirtækjum þurfa að gangast undir sérstakt hæfismat sem Fjármálaeftirlitið annast, samkvæmt frumvarpi efnahags- og viðskiptaráðherra til breytinga á lögum um fjármálafyrirtæki.

Sú ráðstöfun, ásamt öðrum, eiga meðal annars að verða til þess að stjórnarmenn í fjármálafyrirtækjum geri sér fulla grein fyrir þeirri persónulegu ábyrgð sem þeir bera á meðan þeir sitja í stjórn.

Samkvæmt frumvarpinu lítur ráðherra svo á að í núgildandi lögum séu ekki gerðar nægilega ríkar kröfur til stjórnarmanna og er því hert á þeim víða í frumvarpinu.

Er til dæmis kveðið á um að stjórnarmenn þurfi að hafa þekkingu á þeirri starfsemi sem viðkomandi fjármálafyrirtæki stundar.

Þá á Fjármálaeftirlitið að setja reglur um fjárhagslegt sjálfstæði stjórnarmanna og geta þær, samkvæmt greinargerð, meðal annars innihaldið ákvæði um að stjórnarmaður skuli ekki skulda fjármálafyrirtækjum verulega fjármuni, ef til vill sem hlutfall af árstekjum hans, að hann sé ekki í verulegum ábyrgðum fyrir aðra eða að hann sé ekki eigandi eða stjórnandi fyrirtækis sem stendur fjárhagslega höllum fæti.- bþs