Enn að reikna greiðslujöfnun

Viðskiptavinur Íbúðalánasjóðs, sem hafði byrjað í greiðslujöfnun en ákvað svo að afþakka hana, fékk svar frá sjóðnum um að hann gæti ekki afþakkað greiðslujöfnunina, nema hann fyrst greiddi upp alla fjárhæðina sem sett hafði verið á jöfnunarreikninginn.

Greiðslujöfnun hefur hins vegar verið kynnt sem úrræði er mætti afþakka hvenær sem er.

Svanhildur Guðmundsdóttir, sviðsstjóri hjá Íbúðalánasjóði, skýrir þetta með því að tölvukerfi Reiknistofu bankanna hafi ekki verið tilbúið í ýmsar tæknilegar útfærslur sem fylgdu lögum um greiðslujöfnun. Því hafi ekki verið fundin rétt aðferð til að setja jöfnunarupphæðina inn á höfuðstólinn. Þetta sé í vinnslu og verði mögulegt í framtíðinni.

Ríkisstjórnin vildi að frá þessu yrði gengið fyrir 1. nóvember.

„Þetta hefur ekki gengið eins hratt og til stóð. Við viljum hafa útfærsluna á þessu alveg rétta svo þetta sé rétt vaxtareiknað," segir Svanhildur.

Spurð hvers vegna viðskiptavinum, sem afþakka greiðslujöfnun, sé ekki bent á að innan skamms megi búast við því að þeir þurfi ekki að greiða jöfnunarupphæðina, segir hún að það sé réttmæt ábending.

- kóþ