Mikill hiti í nemendum vegna árshátíðarmálsins

„Ákvörðunin stendur," segir Guðrún Hrefna Guðmundsdóttir, skólameistari í Fjölbrautaskólans í Breiðholti, um þá ákvörðun að meina nemendafélaginu í FB að halda árshátíð utan Reykjavíkur.

Undanfarin ár hefur árshátíð verið haldin utan höfuðborgarsvæðisins, en skólastjórnendum þykir reynslan ekki nógu góð. Skólameistarinn sendi því nemendum bréf vegna málsins í síðustu viku og sagði að skólayfirvöld gætu ekki ábyrgst slíkt skemmtanahald þar sem foreldrar geti ekki sinnt eftirlitsskyldu sinni með fullnægjandi hætti. Nemendur hafa brugðist illa við og mótmæltu sumir þeirra með því að skrópa í skólanum í dag. Þá hefur komið til tals að senda ekki lið í Gettu betur keppnina.

Guðrún Hrefna segir að ákvörðunin, sem staðið verði fast við, sé sú að árshátíðin verði ekki haldin á Selfossi. „En við viljum náttúrlega mjög gjarnan að það verði haldin árshátíð og við viljum leggja þeim lið okkar í að finna annan stað og annað fyrirkomulag," segir Guðrún Hrefna. Nemendur ætli að funda um málið í hádeginu á morgun og hún muni ræða við nemendur þá.

Guðrún Hrefna segir að það sé mikill hiti í málinu núna. „Þetta er sársaukafullt fyrir þau," segir Guðrún Hrefna. Hún bendir hins vegar á að ákvörðunin sé ekki tekin beint út í loftið. Reynsla undanfarinna ára sé höfð til grundvallar.