Bandaríkjamenn undirbúa risa vopnasölusamning

Stærsti vopnasölusamningur í sögu Bandaríkjanna er á teikniborðinu. Frá þessu er greint í Wall Street Journal í dag og sagt að Barack Obama forseti búi sig nú undir að skýra þinginu frá áformunum.

Um er að ræða samning um sölu á herþotum til Sádí Arabíu og er talað um að samningurinn sé metinn á 60 milljarða bandaríkjadala, sem samsvarar rúmum sjö þúsund milljörðum íslenskra króna.Gangi samningar eftir verða 84 F-15 herþotur smíðaðar auk nokkura tuga herþyrlna. Að sögn stjórnvalda mun samningurinn virka sem vítamínsprauta á efnahagslífið í Bandaríkjunum en hergagnaiðnaðurinn þar í landi hefur gengið í gegnum erfiðleika undanfarið eins og aðrir geirar.

Talsmenn fyrirtækja á borð við Boeing, Lockheed-Martin og General Electric segja að samningurinn gæti skapað um 75 þúsund ný störf. Að sögn blaðsins er einnig verið að vinna að einskona hliðarsamningi sem myndi þýða 30 milljarða dala í viðbót en Sádar hafa einnig hug á að endurnýja herskipaflota sinn. Fastlega er búist við að Bandaríkjaþing samþykki samninginn enda erfitt að andmæla honum í núverandi efnahagsástandi.