Landskjörstjórn kemur saman

Landskjörstjórn kemur saman seinnipartinn á morgun vegna þjóðaratkvæðagreiðslunnar um Icesave á laugardaginn. Kjörstjórnin fundar aftur um miðjan dag á laugardag og aftur um kvöldið þegar talning atkvæða fer fram.

Fyrir utan að veita umsögn um dagsetningu atkvæðagreiðslunnar er verkefni landskjörstjórnar samkvæmt lögum tvíþætt. Landskjörstjórn skipar einstaklinga til að gæta „tveggja ólíkra sjónarmiða við atkvæðagreiðsluna og úrlausn ágreiningsmála" eins og það er orðað í lögum. Fram kemur í tilkynningu að landskjörstjórn hefur skipað tólf einstaklinga til að gegna þessu hlutverki, einn fyrir hvora fylkingu í hverju kjördæmi. Hlutverk umboðsmannanna í kjördæmunum svarar til hlutverks umboðsmanna framboðslista vegna kosninga til Alþingis.

Meginhlutverk þeirra er að fylgjast með framkvæmd talningar og ef ágreiningur verður milli yfirkjörstjórnar og umboðsmanna um gildi atkvæðaseðla geta þeir skotið honum til úrskurðar landskjörstjórnar.

Að lokinni talningu atkvæða fær landskjörstjórn gerðabækur yfirkjörstjórna ásamt þeim atkvæðaseðlum sem ágreiningur hefur verið um milli yfirkjörstjórnar og umboðsmanna. Landskjörstjórn auglýsir síðan með hæfilegum fyrirvara hvar og hvenær hún kemur saman til að úrskurða um ágreiningsseðlana og lýsa úrslitum þjóðaratkvæðagreiðslunnar. Heimilt er að kæra ólögmæti atkvæðagreiðslunnar til landskjörstjórnar og skulu slíkar kærur sendar landskjörstjórn ekki síðar en tveimur dögum áður en landskjörstjórn kemur saman til að lýsa úrslitum atkvæðagreiðslunnar, að fram kemur í tilkynningunni.

Að öðru leyti er framkvæmd atkvæðagreiðslunnar í höndum dómsmála- og mannréttindaráðuneytisins, yfirkjörstjórna, undirkjörstjórna, sýslumanna og sveitarstjórna í samræmi við lög.