Kærir skólastjóra VÍ fyrir að reka soninn

„Ég á mjög bágt með að sætta mig við að skólastjórinn geti tekið sér þetta vald og farið svona með framtíð þessara ungmenna,“ segir Ingibjörg Ýr Pálmadóttir, móðir pilts sem vikið var úr Verzlunarskóla Íslands.

Alls fimm nemendur voru reknir úr Verzlunarskólanum fyrir tveimur vikum. Ástæðan var léleg mæting sem ekki var bætt þrátt fyrir ítrekuð tilmæli, bæði munnleg og skrifleg, að sögn Inga Ólafssonar skólastjóra.

„Við teygjum okkur að því er sumir segja allt of langt. Þetta gerum við helst aldrei en það kemur að því að það verður að segja hingað og ekki lengra,“ segir Ingi.

Af áðurnefndum fimm nemendum fengu tveir að snúa aftur eftir að í ljós kom að þeir glíma við langvinna sjúkdóma sem skólayfirvöld vissu ekki um, að sögn skólastjórans.

Ingibjörg kveðst hafa kært brottvikninguna til menntamálaráðuneytisins í gær eftir að skólanefndin hafnaði því að taka afstöðu í málinu. Hún telur lög hafa verið brotin á nemendunum auk þess sem reglur skólans heimili ekki brottrekstur. Móðir tveggja annarra nemenda í skólanum hyggst sömuleiðis kæra brottvikningarnar jafnvel þótt hennar börn hafi ekki átt í hlut.

„Í reglunum segir að víkja megi nemendum úr skóla í lengri eða skemmri tíma. Í mínum huga þýðir skemmri tími einn dagur og lengri tími vika,“ segir Ingibjörg, sem er aðstoðarskólastjóri í Ísaksskóla.

„Ég er ekki að segja að það hafi ekkert gengið á áður því þannig var það. En allir þessir krakkar eru virkir í félagslífinu og eru skólanum til sóma.

Skólastjórinn hefði vel getað náð sínu fram með brottvikningu í eina viku. Það er afar mikil ábyrgð sem hvílir á honum því þetta er ákveðin stimplun á krakkana og niðurbrot fyrir þau,“ segir Ingibjörg.

Nemendurnir þrír áttu allir að útskrifast í vor og geta enn náð því. Skólastjórinn segist hafa orðið við óskum þeirra um að fá að mæta í lokaprófin enda sé framtíð þeirra – menntunarlega séð – í húfi. Hann hafnar því að hafa brotið lög.

„Það hefur verið farið eins mildilega að þessu og frekast er unnt. Ef það endar með því að einhver er rekinn úr skóla þá er það sársaukafullt fyrir alla. Þetta er ekki aðeins sársaukafullt fyrir þessa nemendur heldur var þetta einstaklega sársaukafullt fyrir mig líka því mér er hlýtt til þessara nemenda,“ segir Ingi Ólafsson. gar@frettabladid.is