Slökkviliðsmenn segja Flugstoðir stefna mannslífum í hættu

Stjórn Landssambands slökkviliðs- og sjúkraflutningamanna hefur sent frá sér harðorða ályktun varðandi viðbúnaðarþjónustu á Reykjavíkurflugvelli. Þar segir meðal annars að Flugstoðir ehf. stefni mannslífum í hættu með því að gera einungis ráð fyrir tveimur slökkviliðsmönnum á vakt hverju sinni.

„Þann 1. mars s.l. tók Keflavíkurflugvöllur ohf. yfir viðbúnaðarþjónustu á Reykjavíkurflugvelli samkvæmt verktakasamningi sem gerður var við Flugstoðir ohf. Í þeim samningi er aðeins gert ráð fyrir tveimur slökkviliðsmönnum á vakt," segir í ályktuninni.

Þar segir ennfremur að reynsla þeirra slökkvliðsmanna af Keflavíkurflugvelli sem hafa sinnt þessu verkefni síðustu daga hafi nú þegar sýnt fram á að um vanmönnun sé að ræða. „Það leiðir af sér að öryggi slökkviliðsmanna, flugfarþega og annara sem um Reykjavíkurflugvöll fara, er stefnt í hættu."

Þá segir að það sé „með öllu óásættanlegt að Flugstoðir ohf skuli stefna mannslífum í hættu í þeim tilgangi að spara nokkrar krónur og verja ranga ákvarðanatöku."

Að lokum er bent á að í janúar hafi Brunamálastofnun gefið út hvernig manna skuli viðbúnaðarþjónustuna. Þar kemur fram að fjóra slökkviliðsmenn þurfi til þess að sinna viðbúnaðarþjónustunni.

Undir ályktunina ritar Sverrir Björn Björnsson formaður Landssambands slökkviliðs- og sjúkraflutningamanna.