Vill opinbera rannsókn á risaláni ríkisins til VBS Fjárfestingabankans

Fyrrum þingmaður Sjálfstæðisflokksins, Jón Magnússon, vill opinbera rannsókn á lánum ríkisins til VBS Fjárfestingabankans. Á bloggsíðu sinni skrifar Jón að eðlilegt sé að fram fari opinber rannsókn á því sem hann kallar milljarðafyrirgreiðslum Steingríms J. Sigfússonar, fjármálaráðherra.

VBS Fjárfestingabankinn fékk 26 milljarða króna lán frá ríkinu í mars 2009. Í fjölmiðlum kom fram að lánið var veitt til að greiða skuld VBS við Seðlabanka Íslands vegna svokallaðra endurhverfra viðskipta sem ríkið hefur yfirtekið. Með láninu vonaðist ríkið til þess að fá kröfur sínar að fullu greiddar.

Þá fékk Saga Capital einnig lán frá ríkinu eða tæpa sjö milljarða í mars 2009.

Jón er afar ósáttur við þennan gjörning ríkisins enda 26 milljarðar skattgreiðanda tapaðir eftir að FME skipaði bráðabirgðastjórn yfir bankanum.

Jón skrifar svo:

„Um var að ræða fjármálafyrirtæki sem skiptu engu máli varðandi fjármálastarfsemina almennt í landinu. Samt sem áður veitti Steingrímur þeim tuga milljarða fyrirgreiðslu á niðurgreiddum vöxtum allt í boði skattgreiðenda."

Jón telur eðlilegt að einhver axli ábyrgð vegna málsins. Og hann spyr: „Hverjir eru það þá sem eiga að axla ábyrgð ef það er ekki Steingrímur J?"

Að lokum skrifar Jón: „Rannsóknarskýrsla gæti verið tilbúin 1. maí á hátíðisdegi verkalýðsins til upplýsingar um það með hvaða hætti fjármálaráðherra "fólksins" misfer með fjármuni alþýðunnar í þeirri viðleitni sinni að standa við bakið á þeim kapítalistum sem honum eru hugnanlegir."