Sveik út á greiðslukort sýslumanns

Tæplega fertug kona hefur verið ákærð fyrir Héraðsdómi Austurlands fyrir fjársvik. Hún notaði greiðslukortanúmer af Master Card greiðslukorti á nafni embættis sýslumannsins í Stykkishólmi og lét skuldfæra andvirði varnings á greiðslukortareikning sýslumannsembættisins. Hún mætti við þingfestingu málsins í héraðsdómi í fyrradag og játaði sök.

Konan notaði greiðslukortanúmer sýslumannsembættisins í september á síðasta ári. Út á það sveik hún vörur í fjögur skipti í fyrirtækjum á Reyðarfirði, Eskifirði og í Neskaupstað. Varningurinn sem hún sveik út var að verðmæti nær hundrað þúsund krónur.

Þá er konan ákærð fyrir að reyna að svíkja út vörur fyrir tæpar 27 þúsund krónur í einni verslun til viðbótar í Neskaupstað. Enn var hún á ferðinni með greiðslukortanúmer sýslumanns en tókst ekki að fá varninginn afgreiddan.

Í málinu gera tvö fyrirtækjanna sem konan sveik vörur út úr kröfu um skaðabætur. Annars vegar Húsasmiðjan sem krefst þess að hún verði dæmd til að greiða 26 þúsund krónur. Hins vegar Lindarbrekkufrænkur ehf. á Eskifirði sem krefja hana um rúmar sex þúsund krónur.- jss