„Tíu þúsund lítrar eru ekki neitt“

Samtökin Beint frá býli vilja að heimild til heimaframleiðslu utan kvótakerfis í umdeildu mjólkurfrumvarpi sjávarútvegs og landbúnaðarráðherra verði hækkuð úr tíu þúsund lítrum í þrjátíu þúsund. Samtökin segja að frumvarpið gangi ekki nógu langt í núverandi mynd.

Eins og fréttastofa hefur greint frá í umfjöllun um mjólkurfrumvarp sjávarútvegs- og landbúnaðarráðherra þá gerir frumvarpið ráð fyrir að afurðastöðvum sem framleiði utan kvótakerfisins í landbúnaði verði refsað með fésektum. Þá er nýmæli í lögunum sem gerir ráð fyrir að markaðsfæra megi afurðir úr tíu þúsund mjólkurlítrum utan afurðastöðva, þ.e í heimaframleiðslu en í gildandi lögum er ekki gert ráð fyrir heimavinnslu bænda. Framleiðendum þessara afurða verður jafnframt ekki refsað.

Samtökin Beint frá býli gagnrýna frumvarpið og segja að tíu þúsund lítrar séu allt of lítið, en eins og fréttastofa hefur greint frá eru jafngilda tíu þúsund mjólkurlítrar ársframleiðslu einnar góðrar mjólkurkýr.

„Tíu þúsund lítrar eru ekki neitt, ef þetta á að vera raunveruleg búbót fyrir bændur, framleiðendur, þá þarf þetta að vera miklu hærra og í raun og veru er óþarft að hafa eitthvað þak, en við báðum um þrjatíu þúsund lítra," segir Hlédís Sveinsdóttir, formaður Beint frá býli. Hún segir að til þess að bændur geti farið fjárfestingar þurfi magnið sem framleiða megi að vera nægilega mikið að fjárfestingarnar borgi sig. Um það bil fjórir til sex bændur á Íslandi eru í heimaframleiðslu á mjólkurafurðum í dag.

„Ef við segjum að hver framleiðandi noti þrjátíu þúsund lítra og hver bóndi noti og það séu tíu framleiðendur gróft reiknað, fleiri en þeir eru í raun, þá eru þetta þrjú hundruð þúsund lítrar eða 0,25 prósent af þessum hundrað og nítján milljónum lítra sem var heildargreiðslumarki á síðasta verðlagsári. 0,25 prósent eru ekki neitt, neitt," segir Hlédís.