Þroskahamlaður drengur braut tönn á löngu útrunnu Tópasi

„Við keyptum tópaspakkann fyrir þremur dögum síðan," segir verkamaðurinn Sverrir Bergmann Egilsson en hann varð fyrir því óláni að kaupa útrunninn Tópaspakka í versluninni Snælandsvídeo í Setbergi. Í ljós kom að pakkinn rann út í maí á síðasta ári. En það sem verra var, þá fékk tólf ára sonur Sverris sér Tópas áður en þau uppgvötuðu að pakkinn væri útrunninn.

„Drengurinn braut þá tönn. Við sáum svo fyrir tilviljun að pakkinn var löngu útrunninn," segir Sverrir en sonur hans er þroskahamlaður og stundar nám í Öskjuhlíðarskóla.

Að fara með hann til tannlæknis er talsvert flóknara en þegar heilbrigð börn eiga í hlut að sögn Sverris og tekur sem dæmi að fyrir nokkru hafi sonur hans farið til tannlæknis. Þá þurfti að gera við tvær tennur en það kostaði fjölskylduna 150 þúsund krónur. Dýrasti útgjaldaliðurinn er sá að það þarf að svæfa drenginn en hann er meðal annars flogaveikur.

„Þannig við fórum til framleiðandans sem sagði okkur að þeir hefðu selt Tópasið fyrir síðasta söludag. Það væri hinsvegar verslananna að aðgæta hvort vörur væru útrunnar eða ekki," segir Sverrir. Hann fór því í Snælandsvídeo í Setberginu og ræddi þar við yfirmann verslunarinnar.

„Hann brást hinn dónalegasti við. Hann reif einfaldlega kjaft," segir Sverrir sem varð sár vegna viðbragðanna en sjálfur segist hann ekki hafa gert þá kröfu sérstaklega að verslunin greiddi tannlæknareikninginn.

„Við vildum engar skaðabætur, í mesta lagi hefði verið í lagi að fá einn Tópaspakka í staðinn," segir Sverrir sem biður fólk að athuga vandlega með síðasta söludag á Tópaspökkunum sem þeir kaupa í versluninni.