Landspítalinn: Hulda ætlar ekki að snúa aftur

Hulda Gunnlaugsdóttir forstjóri Landspítalans, sem er í ársleyfi frá störfum sínum fram í október á þessu ári, ætlar ekki að snúa aftur á spítalann og hefur sagt upp. Þetta kemur fram á heimasíðu Landspítalans en þar sendir Hulda starfsfólki spítalans kveðju í tilefni af starfslokunum. Hulda var ráðin forstjóri spítalans um miðjan október 2008 en fór svo í ársleyfi í september 2009.

„Leyfi mitt rennur út 1. október og ég hef ákveðið að segja upp starfi mínu sem forstjóri Landspítala frá 1. júli 2010," segir Hulda. „Ég vil nota tækifærið og þakka ykkur fyrir frábærar móttökur sem einkenndust af því að þið mættum mér með opnum huga. Það gerði okkur kleift að ná góðum árangri bæði faglega, fjárhagslega og ekki minnst að setja sjúkrahúsið i þann farveg sem það er nú."

Hulda segir að með góðri samvinnu og kraftmiklu starfi hafi starfsfólki spítalans tekist að „tryggja byggingu „nýs Landspítala" og þar með áframhaldandi góða meðferð, umönnum og framþróun visinda og kennslu á háskólasjúkrahúsinu i þágu allra landsmanna."

Þá segir hún Landspítalann standast samanburð við fremstu sjúkrahús i Evrópu og Bandaríkjunum. „Í mínu starfi hér á háskólasjúkrahúsinu í Osló nota ég ykkur oft sem mælikvarða á gæði þjónustu og framfarir. Þeir bestu geta alltaf orðið betri og ég veit að þið hafið eldhug og þor til að halda merkinu á lofti."