Kvennó-Edda

Fúría, leikfélag Kvennaskólans, frumsýndi Kvennó Eddu 13. Mars síðastliðinn. Kvennó Edda fjallar um örlög og átök í norrænni goðafræði. Leikritið er frumsamið en í því spila örlaganornirnar Urður, Verðandi og Skuld lykilhlutverk. Þær kenna óreyndum völvum að magna seið, spá og galdra. Málin snúast í höndunum á þeim þegar ein af ungu völvunum slysast til að segja Óðni að Baldur verði drepinn og Ragnarök vofi yfir. Þegar mest á reynir koma í ljós brestir í samstöðu Urðar, Verðandi og Skuldar. Kvennó Edda er uppfull af gríni, söng, dansi og dauðsföllum en inn í söguna fléttast sögur af ásum, einherjum, þursum og dvergum.

„Þetta er búið að vera skrýtið og skemmtilegt æfingatímabil. Sum okkar eru nýbúin að taka próf í goðafræðinni en svo fer maður með sama námsefni upp á svið og þá eru allir í hláturskasti.“ Segir Ari Freyr Ísfeld sem leikur Óðinn í sýningu Kvennaskólans.

Leikstjórnin er í höndum Árna Kristjánssonar og Bryndísar Óskar Þ. Ingvarsdóttur, en þau hafa kennt spuna í Kvennaskólanum síðastliðin tvö ár. Ásamt því hefur Árni leikstýrt Iðnaðarmannaleikhúsinu og leikhópnum Mixed theatre í London.

Kvennó Edda er sýnd í Uppsölum Kvennaskólans og Árni segir að aldrei hafi annað komið til greina en að sýna þar: „Menningararfurinn snýst að svo stórum hluta um fólkið sem deilir honum sín á milli. Það er látlaus og heimilislegur andi yfir Uppsölum Kvennaskólans og okkur Bryndísi fannst hann fullkominn fyrir Kvennó Eddu.“

Næstu sýningar eru eftirfarandi;

18.mars 20:00

20.mars 18:00

20.mars 22:00

21.mars 20:00

23.mars 20:00

24.mars 20:00

Miðapantanir eru í síma 821-3775 og á leikfelagidfuria@gmail.com. Sýnt verður í Uppsölum Kvennaskólans (Þingholtsstræti 37). 



Þessi frétt er skrifuð af fulltrúa Kvennó fyrir Skólalífið á Vísi.