Þorleifur: Ég hefði getað valið orð mín betur

Þorleifur Gunnlaugsson, borgarfulltrúi Vinstri grænna, segir að hann hefði getað valið orð sín betur í atburðarásinni sem hófst í kjölfar forvals flokksins um síðustu helgi. Við hafi tekið tilfinningaþrungið ferli og ásakanir gengið á víxl.

Frambjóðendur í forvalinu fengu misvísandi upplýsingar um túlkun forvalsreglna frá kjörstjórn. Sumum þeirra var sagt að þeim væri leyfilegt að fara á milli með prentaða kjörseðla heim til fólks og koma þeim síðan til skila. Þetta kærði Þorleifur til kjörstjórnar sem hefur nú sagt af sér. Samt sem áður standa úrslit forvalsins. Þorleifur hafnaði í öðru sæti en hann sóttist eftir fyrsta sætinu líkt og Sóley Tómasdóttir sem fékk 40 fleiri atkvæði í það sæti.

Þorleifur fjallar um málið á pistli á bloggsíðu sinni. Hann segir að sú niðurstaða kjörstjórnar að vísa kæru sinni frá hafi verið algjörlega óásættanleg.

„Eftir fylgdi tilfinningaþrungið ferli þar sem ásakanir gengu á víxl. Ýmislegt var sagt sem ég hugsa að ýmsir myndu vilja taka til baka. Ég segi fyrir mitt leyti að ég hefði getað valið mín orð betur. En ég var og er hinsvegar sannfærður um að það þurfti að leysa þetta mál á annan hátt en upphaflega var gert," segir Þorleifur.

Hann segir að stjórnmálaflokkar sem ætli að leyfa sér að gagnrýna verði að geta tekið gagnrýni. Þeir verði að gagnrýna sjálfan sig. „Þar þýðir ekkert pukur eða leynimakk. Það verður að sjálfsögðu að vera trúnaður milli fólks en það má ekki vera þannig að sendiboðinn sé alltaf skotinn," segir Þorleifur í pistlinum sem er hægt að lesa hér.