Kynferðisbrotamaður handtekinn af tálbeitu

Þrítugur karlmaður var dæmdur í tólf mánaða fangelsi í Héraðsdómi Suðurlands fyrir að klæmast við þrettán ára unglingsstúlku og að hafa ætlað að hafa við hana kynferðismök.

Athygli vekur að lögreglan notaði tálbeitu í málinu.

Maðurinn var handtekinn í maí á síðasta ári en hann hafði verið í msn-samskiptum við stúlkuna. Hann klæmdist við hana og reyndi að fá að hitta hana. Faðir stúlkunnar komst að samskiptum dóttur sinnar við manninn og lét lögregluna vita.

Í kjölfarið skráði lögreglukona sig inn á forritið undir nafni stúlkunnar og þóttist vera hún. Eftir nokkur samskipti ákváðu þá að hittast við sundlaug.

Maðurinn kom þangað í þeim tilgangi að hafa við hana kynferðisleg samskipti.

Lögreglan handtók manninn þegar hann mætti á vettvang.

Hann játaði að hafa verið í samskiptum við stúlkuna en hélt því fram að hann hefði haldið að hún væri átján ára gömul.

Hann var engu að síður dæmdur í tólf mánaða skilorðsbundið fangelsi til þriggja ára.

Þá var honum gert að greiða stúlkunni 150 þúsund krónur vegna málsins.

Samkvæmt dómsorði mátti lögreglan nota tálbeitu til þess að komast að því hver maðurinn væri. Lagaheimild er til um það að lögreglan fái að nota tálbeitu til þess að upplýsa glæpi.