Réttmæti gagna verið staðfest

Landlæknisembættið hefur brugðist við gagnrýni Félags íslenskra hjúkrunarfræðinga á mati embættisins á stöðu öryggismála varðandi mönnun á Landspítalanum. FÍH sendi frá sér yfirlýsingu þar sem efast er um að matið sé byggt á áreiðanlegum eða réttmætum gögnum. Fréttablaðið fjallaði um málið í gær.

Gagnrýni FÍH snýr að gögnum úr sjúklingaflokkunarkerfi sem nýtt voru í úttektinni. Er efast um að þau séu nothæf þar sem gagnagrunnurinn hefur ekki verið uppfærður síðan 2004 og hefur verið tekinn úr notkun.

Á heimasíðu landlæknis segir að sjúklingaflokkunarkerfið hafi verið notað á LSH allt frá árinu 1987 í þeim tilgangi að fylgjast með hjúkrunarþörfum sjúklinga og reikna út æskilega mönnun í samræmi við þær.

Landlæknisembættið telur þessi gögn mjög mikilvæg fyrir eftirlit með hjúkrunarþjónustu á LSH.

„Samkvæmt upplýsingum frá LSH hefur verið fylgst reglulega með áreiðanleika gagnanna jafnframt því sem réttmæti þeirra hefur verið staðfest hérlendis meðal notenda,“ segir á heimasíðunni. „Landlæknisembættið hefur enga ástæðu til að efast um áreiðanleika eða réttmæti gagna úr sjúklingaflokkunarkerfi LSH og stendur við þær upplýsingar sem fram koma í greinargerð til ráðherra um mat á stöðu öryggismála varðandi mönnun á LSH.“ - shá