Börðu pilta með felgujárni

Tveir tæplega tvítugir piltar hafa verið ákærðir fyrir sérstaklega hættulega líkamsárás. Að auki er annar þeirra ákærður fyrir brot gegn valdstjórninni, þjófnað og fleira.

Piltunum er gefið að sök að hafa að kvöldi 25. júlí 2008 í Spönginni í Reykjavík, ráðist á tvo jafnaldra sína, slegið þá með krepptum hnefum í andlit og líkama, sparkað ítrekað í þá víðs vegar um líkama og slegið þá með felgujárni í hand- og fótleggi. Afleiðingar árásarinnar voru þær að fórnarlömbin voru með opin sár og aðra áverka, auk þess sem annað þeirra nefbrotnaði.

Þá er annar piltanna ákærður fyrir að hafa stolið bíl og ekið honum réttindalaus og undir áhrifum fíkniefna, þar til hann lenti í árekstri. Hann stakk af frá slysstað.

Sami piltur er ákærður fyrir innbrot í verslun og stuld á fartölvu.

Loks er honum gefið að sök að hafa kýlt starfsmann meðferðarheimilis í andlitið. Starfsmaðurinn marðist talsvert við höggið.

Aðstandendur piltanna, sem hinir ákærðu réðust á, gera skaðabótakröfu á hendur þeim upp á rúmlega eina milljón króna.

- jss