Þriggja ára fangelsi fyrir nauðgun og sifjaspell

Héraðsdómur dæmdi í dag karlmann í þriggja ára fangelsi fyrir nauðgun og sifjaspell auk fjölda annarra brota. Hann var sakfelldur fyrir að nauðga systur sinni í júní í fyrra auk þess sem hann útvegaði henni ofskynjunarlyfið LSD. Maðurinn bar við minnisleysi en DNA rannsókn þótti sanna að hann hafi haft mök við systur sína.

Að auki var hann sakfelldur fyrir fjölda annara brota á borð við innbrot og þjófnaði úr verslunum.

Maðurinn var hins vegar sýknaður af annari nauðgunarákæru þar sem ekki þótti sannað með óyggjandi hætti að samfarir hefðu farið fram gegn vilja stúlkunnar sem kærði hann síðar fyrir nauðgun.

Dómari dæmdi manninn því til þess að greiða systur sinni rúma eina milljón króna í bætur auk þess sem hann sæta fangelsi í þrjú ár. Þá var hann einnig sviptur ökuréttindum ævilangt.