Jón vill bæði ísbjörn og fleiri leikskólapláss

Jón Gnarr tekur ekki afstöðu til þess hvort skynsamlegra sé að koma fleiri börnum inn á leikskóla í borginni eða koma upp aðstöðu fyrir ísbjörn í húsdýragarðinum. Hann vill gera hvorutveggja og segir alþjóðleg dýraverndunarsamtök hafa sýnt vilja til að styrkja komu ísbjarnar í garðinn.

Í fréttum Stöðvar 2 í gær kom fram að forstöðumaður Fjölskyldu- og húsdýragarðsins telur að það muni kosta mikið að útbúa aðstöðu fyrir ísbirni í garðinum eins og Besti flokkurinn hefur lagt til. Framsóknarmenn hafa skotið á að það myndi kosta um 250 milljónir en hann telur að verja þurfi talsvert meira fé til þess að gera aðstöðuna.

Jón Gnarr, verðandi borgarstjóri og formaður Besta flokksins, minnir á að ísbirnir séu á válista hjá alþjóðlegum náttúruverndarsamtökum. Loftslagsbreytingarnar hafi breytt heimkynnum hans og valdi því að von sé á fleirum hingað til lands. Betra sé að koma dýrunum fyrir í Húsdýragarðinum áður en þau eru flutt til heimkynna sinna heldur en að skjóta þau.

„Startkostnaðurinn er vissulega einhver en ég held að hagnaðurinn sé miklu meiri ef við hugsum þetta til enda," segir jón og nefnir að ísbirnir munu draga að ferðamenn og hægt væri að nýta verkefnið til rannsókna á lifnaðarháttu villtra dýra og breytinga á náttúrufari.

En hvort þykir Jóni mikilvægara að koma fá 160 börnum inn í leikskóla eins og hægt væri að gera fyrir 250 milljónir og nefnt var í fréttum Stöðvar 2 í gær eða koma ísbirni fyrir?

„Ég held að það sé hægt að gera þetta án þess að skera niður beinlínis út af þessu," segir Jón.

Hvenær á að hrinda þessu í framkvæmd? „Það verður ekki gert á einum degi. Ég mun gera það í nánu samstarfi við starfsfólk Húsdýragarðsins og líka í samvinnu við alþjóðleg náttúruverndarsamtök sem hafa sýnt þessu gríðarlegan áhuga," segir Jón.

Jón segist hvorki vilja hækka útsvör eða hærri þjónustugjöld heldur vilji hann reyna að skapa borginni tekjur með nýjum leiðum. Til að mynda með alþjóðlegu hvítflibbafangelsi sem hann hafi áður nefnt. Hann segist hafa verið í óformlegum samskiptum við fangelsismála yfirvöld vegna málsins og segir að þar hafi hugmyndum sínum verið mjög vel tekið. Ekki náðist samband við forstjóra Fangelsismálstofunnar vegna málsins í dag.