Ráðherra áminnir forstjóra Sjúkratrygginga

Álfheiður Ingadóttir heilbrigðisráðherra hefur í hyggju að áminna Steingrím Ara Arason forstjóra Sjúkratrygginga Íslands fyrir brot á almennum starfsskyldum ríkisstarfsmanna samkvæmt lögum um réttindi og skyldur starfsmanna ríkisisins. Forsaga málsins er sú að Steingrímur leitaði til ríkisendurskoðanda í kjölfar þess að ráðherra setti reglugerð um þáttöku sjúkratrygginga í tannlækninga- og tannréttingakostnaði.

Í bréfi til Steingríms segist ráðherra telja að honum hefði borið að leita fyrst til ráðuneytis eða ráðherra. „Með því að leita ekki beint til ráðuneytisins hafir þú brotið gegn góðum starfsháttum og hollustu- og trúnaðarskyldum þínum," segir ráðherra meðal annars.

Í bréfinu er Steingrími veittur kostur til andmæla til og með 13. apríl næstkomandi og nú hefur hann sent ráðherra bréf sem hann sendir einnig á fjölmiðla. Þar segir Steingrímur að bréf ráðherra hafi komið sér í opna skjöldu „og það leið nokkur tími þar til ég áttaði meig á alvarleika bréfsins," segir hann. Steingrímur bætir því við að nokkrar spurningar hafi í framhaldinu vaknað og setur hann þær fram í bréfinu.

Ætlar áfram að leita sér ráða

Steingrímur spyr ráðherra meðal annars hvort það geti verið að hann, sem forstjóri, hafi brotið af sér með því að leita ráða hjá ríkisendurskoðanda. Hann spyr ennfremur hvort það geti verið að ef hann leiti á ný ríkisendurskoðanda út af sama máli þá beri ráðherra að veita honum lausn frá starfi. Ennfremur spyr Steingrímur hvernig hann geti starfað sem forstjóri stofnunar með rúmlega 100 starfsmenn eftir að ráðherra hefur staðfest trúnaðarbrest bréflega.

Steingrímur spyr fjölda annarra spurninga í bréfinu en í niðurlagi þess segir: „Eftir sem áður er það niðurstaða min að ég eigi engan annan kost en að leita mér ráða hjá mér reyndari mönnum, opinbera áform ráðherra svo og þetta bréf og vinna síðan málið áfram fyrir opnum tjöldum. Einungis þannig geti ég sýnt þér og embætti þínu lögboðna hollustu og trúnað. Annað séu ekki góðir starfshættir."