Hannar fyrir viðbjóðslegustu mynd allra tíma

„Ég stórefast um að myndin verði nokkurn tíma sýnd á Íslandi,“ segir hönnuðurinn Ómar Örn Hauksson.

Ómar vann kynningarefni fyrir kvikmyndina Pig eftir leikstjórann Adam Mason. Stærsta hryllingsmyndatímarit Bandaríkjanna Fangoria fjallaði um myndina á dögunum og sagði að hún væri óþægilegasta, viðbjóðslegasta og ofbeldisfyllsta mynd allra tíma. Þá lagði tímaritið til að hún yrði bönnuð. Myndin fjallar í stuttu máli um mann sem pyndar og drepur fólk stanslaust í 90 mínútur.

Ómar fékk titilinn meðframleiðandi í laun fyrir vinnu sína að kynningarefni myndarinnar. Hann hefur þrátt fyrir það ekki horft á alla myndina. „Hún gengur ansi langt verð ég að segja. Ansi, ansi langt. Þetta er með því ógeðfelldara sem ég hef séð og ég hef séð margt,“ segir hann.

Næst á dagskrá hjá Adam Mason er vestri og Ómar vinnur einnig kynningarefnið fyrir hana. „Ég heimtaði eiginlega að fá að vera kúreki í henni,“ segir Ómar í léttum dúr. „Það væri rosa gaman. Hann sagðist ætla að redda því.“ - afb