Gísli Marteinn sáttur við fimmta sætið

Gísli Marteinn Baldursson, borgarfulltrúi Sjálfstæðisflokks, segir að það sé alltaf leiðinlegt að ná ekki þeim árangri sem stefnt er að. Hann stefndi á annað sætið í prófkjöri sjálfstæðismanna í Reykjavík sem fór fram síðastliðinn laugardag en hafnaði í því fimmta.

Borgarfulltrúinn segir í pistli á heimasíðu sinni að keppnin um annað sætið hafi verið mikil og atkvæði dreifst á fimm frambjóðendur. Hann hafi fengið næstflest atkvæði þeirra sem stefndu á annað sætið og þá hafi hann verið einungis 18 atkvæðum frá því að hafna í þriðja sæti.

„Þrátt fyrir þetta uni ég 5. sætinu ekkert illa. Ég hef ástríðu fyrir borgarmálunum og er þakklátur fyrir það tækifæri sem ég hef fengið til að vinna að þeim. Ég hef alltaf sagt að ég er í borgarpólitík útaf fyrriparti þess orðs, en ekki hinum síðar, og ég get vonandi lagt gott til málanna úr hvaða sæti sem er," segir Gísli Marteinn.

Í aðdraganda borgarstjórnarkosninganna vorið 2006 sóttist Gísli Marteinn eftir oddvitasætinu í prófkjöri sjálfstæðismanna en Vilhjálmur Þ. Vilhjálmsson hafði betur. Gísli Marteinn hafnaði í þriðja sæti í því prófkjöri.

Hægt er að lesa pistli Gísla Marteins hér.