Vesturport fær virt leiklistarverðlaun

Leikhópurinn Vesturport fær Evrópsku leiklistarverðlaunin þetta árið. Frá þessu er greint á bloggsíðu Will Gompertz, þáttastjórnanda Today, á BBC.

Gísli Örn Garðarsson, forvígismaður Vesturports var í viðtali hjá Gompertz í morgun og sagðist Gísli um ótrúlegan heiður að ræða, sérstaklega í ljósi þess ástands sem ríkt hafi á Íslandi síðustu misserin. Allt jákvætt umtal um Ísland erlendis væri því af hinu góða.

Leiklistarverðlaunin eru talin á meðal þeirra virtustu í bransanum og á meðal fyrri verðlaunahafa má nefna Peter Brook, Tinu Bausch og Harold Pinter.

Vesturport frumsýnir í kvöld uppsetningu sína og Borgarleikhússins á Faust í Young Vic leikhúsinu í London. Undanfarnar tvær vikur hafa 25 íslenskir leikarar og tæknimenn frá Borgarleikhúsinu verið að störfum í leikhúsinu ásamt erlendum starfsbræðrum sínum við aðlögun verksins að nýju rými. Sýningar verða á mikilli keyrslu, sjö sinnum í viku til 30. október. Mikil sala er á sýninguna en hún er hluti af 40 ára afmælishátíð Young Vic leikhússins.

Hér er hægt að hlusta á viðtalið við Gísla.