Ásmundur skráði á vef en ekki hagsmunaskrá og lét lagfæra

Ásmundur Einar Daðason lét hjá líða að greina frá eign sinni í fyrirtæki sem rekur vefverslun með búvörur í hagsmunaskrá Alþingis, en minnist á fyrirtækið á ferilskrá sinni á vef þingsins. Hann kennir gleymsku um og segist hafa nú hafa óskað eftir því að hagsmunaskrá sinni verði breytt og að þar verði settar inn upplýsingar um fyrirtækið og starfsemi þess.

Ásmundur Einar á fjórðungshlut í fyrirtækinu Daðason og Biering ehf. sem rekur vefverslunina Ísbú á vefnum ísbú.is. Vefverslunin var áður rekin af fyrirtæki sem var í jafnri eigu Ásmundar Einars og föður hans. Daðason og Biering var stofnað í ágúst síðastliðnum. Ekki kom neitt fram um eignarhlut hans í Daðasyni og Biering ehf. Í hagsmunaskrá þingsins eins og reglur kveða á um en þar eiga þingmenn m.a að skrá upplýsingar um „starfsemi sem unnin er samhliða starfi alþingismanns og er tekjumyndandi fyrir hann eða félag sem hann á sjálfur eða er meðeigandi í."

Í samtali við Vísi í gær sagði Ásmundur: „Það vantaði bara þessa einu setningu að ég ætti 25% hlut í fyrirtækinu Daðason og Biering ehf. en ég tók fram á vefnum að ég ræki lítið fyrirtæki tengdu innflutningi á búrekstrarvörum, það vantaði bara þessa litlu klausu í viðbót."

Ásmundur er þarna að vísa til ferilskráar sinnar á vef þingsins, en þar segir að Ásmundur sé „sauðfjárbóndi á Lambeyrum í Dalasýslu og rekur þar innflutnings- og sölufyrirtæki með vörur fyrir landbúnað." Hvergi er hins vegar minnst á fyrirtækið í hagsmunaskránni eða eignarhlut í því (23/12 kl. 13:18) Þetta hefur Ásmundur hins vegar lagfært strax og komið á framfæri við starfsfólk þingsins.

Ásmundur fór yfir þetta í samtali við fréttastofuna í hádegisfréttunum. „Það kemur fram á vefsíðu Alþingis, það setti ég inn eftir að hafa ráðfært mig við starfsfólk Alþingis. Síðan eignaðist ég ekki formlega hlut í þessu fyrirtæki fyrr en í haust og mér láðist að biðja starfsfólk Alþingis um að [uppfæra hagsmunaskrána] og það verður gert strax í dag," sagði Ásmundur. thorbjorn@stod2.is