Menningarstofnun á Grundarstíg í óvissu

Úrskurðarnefnd skipulags- og byggingarmála hefur ógilt byggingarleyfi til handa sjálfseignarstofnuninni Hannesarholti á Grundarstíg 10 og sömuleiðis breytingu á notkun hússins úr íbúð í húsnæði undir blandaða atvinnustarfsemi.

„Við erum mjög slegin yfir þessari niðurstöðu, sér í lagi þar sem tilgangurinn er að opna þetta sögufræga hús fyrir almenningi," segir Ragnheiður Jónsdóttir, einn eigenda hússins, sem á sínum tíma var byggt af Hannesi Hafstein, skáldi og ráðherra.

Borgarráð staðfesti byggingarleyfi fyrir stækkun og breytta notkun hússins á Grundarstíg 10 í ágúst í fyrra. Meðal annars var leyft að hækka risið og rífa bílskúr til að geta komið fyrir viðbyggingu með litlum sal fyrir tónlistarflutning og fleira.

Nágrannarnir í húsinu andspænis við götuna kærðu ákvörðun borgarráðs. Sögðu þeir starfsemi Hannesarholts myndu valda ónæði inni í miðju íbúðahverfi.

Úrskurðarnefndin segir að ætla megi að starfseminni fylgi aukin umferð og umgangur, hávaði og aukið álag á bílastæði fram eftir kvöldum.

Breytingin á notkun hússins væri svo veruleg að ekki hafi verið skilyrði til að afgreiða byggingarleyfi eftir undantekningarákvæði eins og borgaryfirvöld gerðu. Ekki væri gerð grein fyrir því hvernig mæta eigi aukinni þörf fyrir bílastæði.

„Loks er engin grein gerð fyrir því hvernig hið umdeilda byggingarleyfi samræmist stefnumarkandi ákvörðunum þróunaráætlunar miðborgar um íbúðarsvæði, samþykktum í borgarráði 10. október 2000, þar sem fram kemur að á íbúðasvæðum miðborgarsvæðis sé meginmarkmið borgaryfirvalda að vernda og bæta íbúðabyggð og umhverfi hennar," segir enn fremur í niðurstöðu úrskurðarnefndarinnar.

Markmið Hannesarholts er „að efla jákvæða, gagnrýna hugsun í íslensku samfélagi, auka skilning á gildi sögunnar fyrir samtímann og framtíðina og hvetja til uppbyggilegrar umræðu og samveru."

Ragnheiður segir að slík starfsemi ætti að fá að blómstra og að viðtökur fram til þessa hafi almennt verið afar jákvæðar.

„Þetta er mitt hjartans mál og ég er þakklát fyrir að geta gert þetta en manni finnst erfitt að geta tekið þátt í uppbyggingu og mega það ekki. Í þessu hverfi, sem hefur alla tíð verið blandað, sjáum við ekki þessa ógn eins og þessir einstaklingar sem kærðu leyfisveitingu Reykjavíkurborgar," segir Ragnheiður Jónsdóttir. gar@frettabladid.is