Styrkti á rangan hátt

Kópavogsbær kann að hafa farið á skjön við lög þegar hann veitti ekki bein fjárframlög til Sjálfstæðisflokksins árið 2008, heldur keypti auglýsingar í málgögnum flokksins.

Lög um fjármál stjórnmálasamtaka skylda flest sveitarfélög til að leggja stjórnmálaflokkum til framlög hafi þau einn kjörinn fulltrúa í sveitarstjórn eða fleiri, eða náð fimm prósenta fylgi. Ekki er skýrt kveðið á um það í lögunum hvernig þessir styrkir eigi að vera.

Gunnsteinn Sigurðsson bæjarstjóri segir að á næsta fjárhagsári verði þetta öðruvísi, enda á að hans mati að veita bein framlög með peningum: „Það er alveg rétt að þetta á að vera með öðrum hætti," segir hann.

Framlögin eiga að dreifast jafnt á alla flokka, miðað við gengi þeirra í kosningum.

Árið 2008 keypti bærinn auglýsingar í ótilgreindum flokksmálgögnum sjálfstæðismanna fyrir 1.850.000 krónur. Þetta er bókfært sem útgáfustyrkur upp á 1.800.000 hjá flokknum, en sem kaup á auglýsingum hjá Kópavogi.

Fréttablaðið hefur óskað eftir upplýsingum um hvort bærinn hafi keypt auglýsingar í málgögnum annarra flokka 2008 og hve mikið þau málgögn fengu.

- kóþ