Ekkert samkomulag um makrílveiðar

Ekki náðist samkomulag um skiptingu heildarafla úr markílstofninum, á fundi strandríkja, sem lauk í Noregi í gær. Önnur ríki, sem eiga hagsmuna að gæta, reyna að afneita þeirri staðreynd að makríllinn er farinn að veiðast í stórum stíl við Íslandsstrendur.

Á fundinum voru fulltrúar Evrópusambandsins, Færeyja, Íslands, Noregs og Rússlands og var ætlunin að ná samkomulagi um framtíðarstjórnun Makrílveiða í Norðaustur Atlantshafi, en mikið ber í milli. Meðal annars eru hin ríkin treg til að viðurkenna rétt Íslendinga til veiða úr stofninum, þótt hann leiti í æ ríkara mæli inn í íslenska lögsögu.

Það hefur gerst með ævintýralegum hætti því árið 2006, þegart sjómenn fóru eitthvað að veiða hann hér við land, veiddust sautján hundruð tonn en í fyrra, aðeins fjórum árum seinna var aflinn komin upp í 112 þúsund tonn, eða hátt í loðnukvótann í ár, og skiipti útflutningsverðmætið mörgum milljörðum króna.

Þá hafa útvegsmenn lagt í fjárfestingar til að geta unnið hann um borð til manneldis, til að margfalda verðmætið, og verið er að koma síkri vinnslu upp í landi líka. Hagsmunirnir eru því miklir. Annar fundur verður haldinn eftir mánuð og verður hann hér á landi.