Wenger: Fólk tekur okkur ekki alvarlega

Arsene Wenger, stjóri Arsenal, segir að þó svo lið hans standi afar vel að vígi í baráttunni um enska meistaratitilinn njóti það enn takmarkaðrar virðingar. Þess utan séu menn ekki enn farnir að taka liðið alvarlega.

„Þegar maður tapar sannfærandi fyrir hinum toppliðunum þá tekur mann enginn alvarlega eftir það. Það er enn til fólk í dag sem tekur okkur ekki alvarlega. Það tekur tíma að sannfæra fólk á nýjan leik," sagði Wenger.

„Það var ekki hægt að spá því að Chelsea myndi tapa stigunum sem það hefur nú gert. Ef Chelsea hefði nýtt sín tækifæri þá væri þetta vonlaust en það var mikilvægt að gefast ekki upp.

„Ég verð að viðurkenna að sigrar Chelsea og Man. Utd á okkur voru sannfærandi. Þá fór fólk að missa sig svolítið og þess vegna lagði ég ríka áherslu á það við leikmennina að gefast ekki upp. Það má aldrei, sama hvað gerist," sagði Wenger.