Þjóðverjar kalla Andra Snæ finnskan spennusagnahöfund

„Ég skrifaði útgefandanum og bað hann um að kanna þetta," segir Andri Snær Magnason, rithöfundur og þjóðfélagsrýnir, en hann tekur þátt í bókamessunni í Leipzig.

Á vefsíðu bókamessunnar er Andri Snær sagður vera finnskur höfundur sem muni á hátíðinni lesa úr spennutrylli sínum LoveStar.

Andri Snær segir þetta bara fyndið og eðlileg viðbrögð við svona sé ef til vill að markaðssetja sig upp á nýtt „þangað til ímynd íslands hafi fengið annan svip, eftir Icesave og allt það," segir Andri. Í útlöndum geti maður kannski bara alveg ráðið því hver maður sé. „Því skyldi ég ekki bara getað markaðssett mig sem þrítugan samkynhneigðan Finna með sinn fyrsta þriller. Við gætum verið að tala um milljónir eintaka hérna!"

Bókin LoveStar hefur mikillar hylli bæði hérlendis og erlendis. Bókin er öðrum þræði ástarsaga og að einhverju leyti nöturleg framtíðarsýn, en fáir myndu sjálfsagt lýsa sögunni sem spennutrylli.

Andri Snær mun á hátíðinni taka þátt í málstofu um heimskreppuna ásamt fimm öðrum höfundum frá Mið- og Austur-Evrópu. Þar munu höfundarnir lýsa persónulegri reynslu sinni og einnig samfélagslegum áhrifum.

Bókamessan hefst 18. mars og stendur til hins 21.