Ellefu HIV smit á tæpum þremur mánuðum

Ellefu manns hafa greinst með HIV smit frá því í byrjun ágúst hér á landi. Þetta kemur fram í Farsóttafréttum Landlæknisembættisins sem birtar voru í dag en í byrjun ágúst höfðu fimm smitast. Sextán manns hafa því í allt smitast það sem af er ári og sóttvarnarlæknir talar um holskeflu síðustu vikur.

Haraldur Briem Sóttvarnarlæknir segir rétt að aukningin sé óvenju mikil á ekki lengri tímabili. „Síðan kom þarna nánast holskefla," segir hann en bætir við að oft rokki fjöldi smita upp og niður. „Oft kemur aukning í árslok en síðustu vikurnar hafa ansi margir verið að greinast," segir Haraldur.

Mest er aukningin á meðal fíkniefnaneytenda en einig eru innflytjendur frá löndum þar sem alnæmi er útbreitt töluverður hópur. Haraldur segir að hjá Landlækni hafi menn þó mestar áhyggjur af fíkniefnaneytendum og smitum í þeim hópi. Þó enn séu rúmir tveir mánuðir eftir af árinu er nú þegar um metjöfnun að ræða. Árið 1985 greindust sextán á öllu árinu en Haraldur bendir á að fyrstu árin sem skimað var eftir veirunni séu ekki mjög marktæk.

„Manni finnst þetta því óþægilega mikið. Og árið er ekki liðið," segir Haraldur Briem.

Nánar er fjallað um málið í Farsóttafréttum.