Þolinmæðin borgaði sig

Verðmæti eigna Kaupþings nam 743 milljörðum króna í lok síðasta árs, að því er fram kemur í skýrslu skilanefndar og var birt í gærmorgun. Upphæðin er 214 milljörðum hærri en í árslok 2008. Þar af nam handbært fé Kaupþings 176 milljörðum króna, sem er 98 milljarða hækkun á síðasta ári.

Skilanefndin endurgreiddi innlánseigendum hjá útibúi Kaupþings í Þýskalandi 58 milljarða króna í fyrra en hafði áður endur-greitt öllum sparifjáreigendum í Noregi, Svíþjóð, Finnlandi og Austurríki. Heildargreiðslur erlendis nema um 125 milljörðum króna.

Steinar Þór Guðgeirsson, formaður skilanefndar Kaupþings, segir að eftir að bankinn var ríkisvæddur hafi verið ákveðið að selja ekki eignir heldur styðja við þær þar til markaðsaðstæður yrðu hagstæðari eða þegar viðunandi verð fengist.

Sem dæmi um það er sala skilanefndar á 5,5 prósenta hlut í norræna tryggingarisanum Storebrand. Norsk yfirvöld frystu hlutinn við fall Kaupþings og hugðust þvinga fram sölu á honum.

Skilanefndin náði sáttum og seldi hann fyrir tuttugu milljarða króna í desember í fyrra, sem var þrefalt hærra verð en fengist hefði ári fyrr. - jab