Dregur úr bókunum með Icelandair vegna verkfallsins

Verkfallsaðgerðir flugumferðarstjóra eru þegar farnar að draga úr bókunum með Icelandair frá landinu, og erlendir ferðamenn, sem eiga bókað til landsins eru sumir orðnir tvístígandi, að sögn Birkis Hólm Guðnasonar, forstjóra Icelandair. Hann segir að verkfallinu sé beint gegn flugfélaginu.

Fjögurra klukkustunda verkfall flugumferðarstjóranna hófst klukkan sjö í morgun þar sem ekki náðist samkomulag í launadeilu þeirra við Flugstoðir í gær. Fimm millilandaflugvélar áttu að fara frá Keflavíkurflugvelli með um 700 farþega á þessu tímabili, og tefst brottför þeirra til klukkan ellefu. Þá tefur þetta líka 15 ferðir innanlands, þar sem 400 manns ætluðu að fljúga, og svo tefst heimkoma millilandaflugvélanna í dag.

Flugumferðarstjórar hafa boðað samskonar verkföll á föstudag, mánudag, miðvikudag og þarnæsta föstudag ef ekki semst. Þannig að ljóst er að leiðakerfi Icelandair mun riðlast verulega ef ekki semst hið bráðasta. Icelandair er þó ekki aðili að deilunni því hún stendur á milli Flugstoða og flugumferðarstjóra.

„Þessi vinnustöðnun er sett upp í fjórar klukkustundir í senn að morgni annan hvern dag. Það hvernig þessum aðgerðum er stillt upp miðast augljóslega við það að valda sem mestri truflun á leiðakerfi og flugi Icelandair. Þegar tafir verða, þó það sé ekki nema í fjóra klukkutíma, setur það í rauninni allt annað flug úr lagi og það tekur yfirleitt tvo sólarhringa að koma þessu í lag en þá hefst næsta verkfall," segir Guðjón Arngrímsson, upplýsingafulltrúi Icelandair.

Guðjón segir verkfallið hafi áhrif á þúsundir flugfarþega í dag. Haldi aðgerðir flugumferðarstjóra áfram sé ljóst að þær muni hafa áhrif á 30 þúsund farþega.