Kalkþörungavinnsla undirbúin við Húnaflóa

Kalkþörungaset á botni fjarðanna við vestanverðan Húnaflóa var fyrst kannað fyrir áratug en hreyfing komst svo á málið í fyrra þegar fyrirtæki í Frakklandi sýndi því áhuga að gera úr því verðmæti.

Jón Óskar Pétursson, framkvæmdastjóri Samtaka sveitarfélaga á Norðurlandi vestra, segir að fyrirtækið hafi fengið rannsóknarleyfi og tekið borkjarnasýni. Beðið sé niðurstaðna úr rannsókn á því.

Úr kalkþörungasetinu er unnið kalk til nota í áburð og fóðurbæti en einnig í matvælavinnslu og lyfjagerð. Hvammstangi er stærsti þéttbýlisstaðurinn í Vestur-Húnavatnssýslu og þar er jafnframt helsta höfn svæðisins.

Jón Óskar segir menn vonast til að einhverskonar starfsemi byggist upp í kringum þetta, svipuð og á Bíldudal við Arnarfjörð, starfsemi sem skapi 10-20 störf. Það sé gríðarlega mikilvægt fyrir byggðarlag sem þetta.