Tvær konur kæra nauðgun

Tvær stúlkur hafa kært nauðgun til lögreglunnar á höfuðborgarsvæðinu eftir helgina. Málin eru í rannsókn hjá kynferðisbrotadeild.

Að því er Fréttablaðið kemst næst er önnur stúlkan sautján ára gömul en hin um tvítugt. Athæfi karlmanns gagnvart þeirri yngri átti sér stað á skemmtistað í borginni, en hinni var nauðgað í bíl á höfuðborgarsvæðinu. Báðar nauðganirnar áttu sér stað um nýliðna helgi en kærurnar bárust til lögreglu í gær.

Stúlkurnar leituðu á neyðarmóttöku Landspítala - háskólasjúkrahúss í Fossvogu fyrir þolendur kynferðisofbeldis eftir árásirnar. Þær voru báðar með áverka eftir ofbeldið.

Samkvæmt upplýsingum Fréttablaðsins þekktu stúlkurnar ekki ofbeldismennina, en gátu í báðum tilvikum gefið greinargóða lýsingu á þeim.- jss