Ármann býður sig fram gegn Gunnari

Ármann Kr. Ólafsson, forseti bæjarstjórnar Kópavogs og fyrrverandi þingmaður, hefur ákveðið að gefa kost sér í fyrsta sæti í prófkjöri Sjálfstæðisflokksins í Kópavogi sem haldið verður 20. febrúar. Áður hefur Gunnar Birgisson, fyrrverandi bæjarstjóri, lýst yfir framboði í leiðtogasætið.

„Mikilvægt er að sjálfstæðismenn setji saman sigurstranglegan lista fyrir bæjarstjórnarkosningarnar næsta vor skipaðan einstaklingum sem hafa til að bera reynslu og ríka samstarfshæfileika, en að jafnframt fari fram nauðsynleg endurnýjun," segir Ármann í tilkynningu.

Hann segir Kópavogsbæ hafa vaxið og dafnað á undanförnum árum og verið í fararbroddi íslenskra sveitarfélaga. Nú ríði á að verja þann árangur sem náðst hafi og standa um leið vörð um grunnþjónustu bæjarins.

„Einnig þarf að breyta vinnubrögðum í bæjarstjórn og mun ég leggja áherslu á aukna samvinnu allra flokka með það að markmiði að vinna bæjarfélagið út úr þeim áföllum sem bankahrunið hefur valdið. Ég mun einnig beita mér fyrir skýrari reglum um opna og gegnsæja stjórnsýslu, og eflingu beins lýðræðis með aukinni aðkomu bæjarbúa að einstökum málum með rafrænum kosningum og rafrænum skoðanakönnunum," segir Ármann.

Ármann hefur setið í bæjarstjórn Kópavogs undanfarin þrjú kjörtímabil og á þeim tíma gegnt formennsku í skipulagsnefnd, skólanefnd og nú í félagsmálaráði. „Þá sit ég í bæjarráði og gegni embætti forseta bæjarstjórnar. Auk starfa fyrir Kópavog hef ég verið þingmaður kjördæmisins og unnið sem aðstoðarmaður ráðherra í þremur fagráðuneytum."