Engin aska í tilraunaflugi British Airways

Flugfélagið British Airways fann engin merki um ösku á Boeing 747 breiðþotu sem það  sendi á loft í gær.

Vélinni var flogið frá Lundúnum til viðhaldsmiðstöðvar félagsins í Cardiff. Hún sveimaði yfir Bretlandi í tvo tíma og fór allt upp í 40 þúsund feta hæð.

Vélin var svo tekin til skoðunar í Cardiff. Þar fundust við fyrstu sýn engin merki um ösku, en vélin er nú til frekari skoðunar.

Þetta verður líklega til þess að herða enn kröfur flugfélaga um að flugheimildir verði að minnsta kosti rýmkaðar, þótt banninu verði ekki að fullu aflétt.