Tæplega helmingur hefur

Tæplega helmingur þeirra sem eru í launaðri vinnu hefur orðið fyrir launalækkun, starfshlutfall hefur verið skert eða annarskonar skerðingu á launakjörum frá hruninu 2008. Þetta kemur fram í nýrri könnun sem sem gerð hefur verið fyrir ASÍ. Þar kemur einnig fram að fjórðungur þeirra sem eru með atvinnu óttast að missa hana.

Samkvæmt ASÍ sýnir könnunin að flestir, eða 20,5% hafa orðið fyrir því að laun hafa verið skert án breytinga á starfshlutfalli. „Hjá 13,6% hefur starfshlutfall verið skert og ríflega 10% hafa orðið fyrir annarskonar skerðingu á launakjörum," segir í frétt um málið á heimasíðu ASÍ og sagt að þetta þýði að 44,4% fólks í launaðri vinnu hafi lent í kjaraskerðingu frá hruninu í október 2008. „Karlar hafa orðið ver úti í kjaraskerðingunni en konur, höfuðborgarbúar ver heldur en íbúar á landsbyggðinni og elsti aldurshópurinn 55-75 hefur frekar orðið fyrir kjaraskerðingu en yngri hóparnir."

Nánar má kynna sér efni könnunarinanr hér.