Kergja vegna frímiða útvalinna í sólarferð

Fimmtíu nemendur við Menntaskólann á Akureyri rituðu nafn sitt á undirskriftalista til að mótmæla því að útvaldir nemendur við skólann fái útskriftarferð sína og uppihald þar ókeypis. Auk nemendanna fá tveir kennarar og makar þeirra frítt í ferðina.

Flestir nemendur þriðja bekkjar Menntaskólans á Akureyri (MA) þurfa að borga tæpar 200 þúsund krónur fyrir ferðina, sem farin verður til Tyrklands í haust. Átta fá ókeypis í ferðina, en þeir eru annars vegar í bekkjarráði, sem skipuleggur ferðina og stundar fjáröflunarstarfsemi, og hins vegar gjaldkeri í sjoppu skólans. Þá fá þeir sem eru í svokölluðu sjoppuráði helming ferðarinnar borgaðan. Alls fara 172 nemendur í ferðina.

Allt er innifalið í ferðapakkanum; rúta, flug, matur, drykkur og gisting á hóteli. Er þetta í fyrsta sinn sem slíkt er gert, en útskriftarferð MA í fyrra kostaði nemendur í kringum 100 þúsund. Hefð er fyrir því að þriðja bekkjarráð skólans fái ferðirnar ókeypis en hingað til hafa allir nemendur borgað uppihald sjálfir.

Helga Sigfúsdóttir, nemi í þriðja bekk, hóf undirskriftarsöfnun til að mótmæla því að óbreyttir nemendur þyrftu að greiða tæpar 2,2 milljónir króna, eða í kringum 14.000 krónur hver, undir aðra. Helga safnaði um 50 undirskriftum, en á listanum stóð: „Mótmælum að þriðjabekkjarráð fái frítt í útskriftarferðina. Í ár er allt innifalið og við erum því að borga fæði fyrir þau, sem ætti ekki að viðgangast.“

Tveir kennarar og makar þeirra fara í ferðina sem fararstjórar. Erfiðlega gekk að fá kennara til að fara í ferðina og kom þá upp sú hugmynd að þeir fengju að taka maka sína með. Þeir fá flug, uppihald og gistingu greitt að fullu frá ferðaskrifstofunni og dagpeninga frá nemendum.

Jón Már Héðinsson skólameistari sagðist ekki vel upplýstur um málið, en sagði fjölda fararstjóra byggja á gamalli reglu. „Þetta er ströng vinnuferð en ekki skemmtiferð fyrir þá sem fara sem fararstjórar. Það þarf ekkert endilega að vera kennari skólans,“ segir hann.

Eftir undirskriftarsöfnunina og fundi var sú málamiðlun gerð að þeir nemendur sem skipulögðu ferðina og unnu sem gjaldkerar sjoppunnar, skyldu borga helminginn af sínu fæði sjálfir.

sunna@frettabladid.is