Sex bankar staðfesta að Iceland átti innistæðurnar

Undirrituð skjöl frá sex bönkum sýna að innistæður upp á 38 milljarða króna sem slitastjórn Glitnis taldi að Jón Ásgeir Jóhannesson hafi ráðið yfir haustið 2008, tilheyrðu bresku verslunarkeðjunni Iceland Foods.

Malcolm Walker, forstjóri bresku verslunarkeðjunnar Iceland Foods, sendi í dag Steinunni Guðbjartsdóttur, formanni slitastjórnar Glitnis bréf þar sem hann staðfestir að bankainnistæður að upphæð 202 milljónir punda hafi tilheyrt félaginu. Jón Ásgeir sendi Lárusi Welding og Jóni Sigurðssyni upplýsingar um innistæðurnar í tölvupósti skömmu fyrir bankahrunið og taldi slitastjórnin það gefa til kynna að Jón Ásgeir tengdist peningunum.

Í bréfi Walker til Steinunnar segir að það sé hagur bæði Iceland Foods og slitastjórnar að málið leysist sem fyrst. Hann voni að hann þurfi ekki að veita frekari upplýsingar vegna málsins. Iceland Foods er að mestu í eigu íslenskra aðila, þar á meðal þrotabús Glitnis.

Með bréfi Walker fylgja undirrituð skjöl frá sex erlendum bönkum sem staðfesta að innistæðurnar tilheyrðu Iceland Foods. Þá segir lögmaður Iceland ennfremur í bréfi til Steinunnar að Jón Ásgeir hafi ekki haft neinn aðgang að bankareikningum félagsins.

Slitastjórn Glitnis segist fyrst hafa fengið veður af því að innistæðurnar tilheyrðu Iceland Foods í fréttum Stöðvar 2 um helgina. Steinunn sagði í fréttum okkar í gær að það þýddi ekki að rannsókn Kroll væri ábótavant.

„Ég er mjög ánægð með rannsóknarvinnuna hjá okkur og tel að hún hafi leitt til mjög góðra niðurstöðu sem við erum að fylgja eftir eins og kunnugt er en það er auðvitað þannig að aðilum er í lófa lagið að veita skýringar en þær skýringar hafa ekki komið fram fyrr en núna í fjölmiðlum," sagði Steinunn.