Jón Ásgeir fékk ekki samþykkta frávísunarbeiðni

Jón Ásgeir Jóhannesson segir að eignir sínar séu samtals einnar milljónar punda virði. Breskur dómstóll féllst ekki á það en dómari í kyrrsetningarmáli sem slitastjórn Glitnis hefur höfðað á hendur honum í Lundúnum féllst ekki á kröfu Jóns Ásgeirs um frávísun.

Lögmanni Jóns Ásgeirs Jóhannessonar tókst ekki að sannfæra dómara í Lundúnum um réttmæti þess að vísa frá kröfu slitastjórnar Glitnis um frystingu eigna hans á heimsvísu í gær. Dómarinn vísaði jafnframt frá kröfu Jóns Ásgeirs þeirra um áfrýjun og féllst dómarinn á það sjónarmið slitastjórnarinnar að Jón Ásgeir hafi ekki gefið réttinum fullnægjandi upplýsingar um eigur sínar.

Samkvæmt því sem Jón Ásgeir hefur gefið upp fyrir breskum dómstólum eru eigur hans á Bretlandi og á Íslandi samtals einnar milljónar punda virði en það er jafnvirði 189 milljóna króna. Taldi breski dómarinn það ósennilegt og tók því undir sjónarmið slitastjórnar Glitnis. Jón Ásgeir sagði í skriflegu svari við fyrirspurn fréttastofu í gær að eigur hans væru samtals einnar milljónar punda virði og áréttað því það sem kom fram í skjölum sem lögð voru fram.

Samhliða kyrrsetningarmáli í Lundúnum hefur slitastjórnin sem kunnugt er höfðað skaðabótamál á hendur Jóni Ásgeiri og fleirum fyrir héraðsdómi New York-fylkis en slitastjórnin krefst 260 milljarða króna í skaðabætur. Í eiðsvörnum vitnisburði fyrir breskum dómstól vegna kyrrsetningarmálsins segist Steinunn Guðbjartsdóttir, formaður slitastjórnar, hafa ástæðu til að ætla að Jón Ásgeir sé enn mjög efnaður maður og að hann hafi leynt eignum sínum, en skjalið með vitnisburði Steinunnar er meðal gagna sem birt er á vef dómstóls New York-fylkis og er hluti af rökstuðningi slitastjórnarinnar þar.

Jón Ásgeir hefur hafnað þessu. Þá hefur hann hafnað því að vera samsamaður eiginkonu sinni, eins og slitastjórnin hafi reynt að gera. Það sé bæði móðgandi gagnvart sér og henni, enda sé hún sjálfstæð kaupsýslukona sem taki sínar eigin ákvarðanir.