Ramos kveður klakann á föstudag

Brasilíski lýtalæknirinn Hosmany Ramos sem setið hefur í varðhaldi hér á landi frá því í ágúst á síðasta ári er loks á heimleið. Hann mun fljúga áleiðis til Brasilíu á föstudaginn kemur að sögn Smára Sigurðssonar hjá Alþjóðadeild Ríkislögreglustjóra. Brasilískir lögreglumenn sem munu fylgja honum koma til landsins í kvöld.

Ramos var handtekinn á Keflavíkurflugvelli í ágúst á síðasta ári þegar hann framvísaði skilríkjum bróður síns. Í ljós kom að um eftirlýstan mann var að ræða en hann á eftir að afplána ellefu ár af 25 ára fangelsisvist í heimalandi sínu. Ramos var á sínum tíma sakfelldur fyrir mannrán og eiturlyfjasmygl.

Yfirvöld í Brasilíu óskuðu eftir því að Ramos yrði framseldur og á það féllst dómsmálaráðuneytið og dómstólar. Hæstiréttur felldi þó úr gildi úrskurð héraðsdóms á sínum tíma og fyrirskipaði að mál Ramosar yrði tekið fyrir að nýju. Það var gert og staðfesti Hæstiréttur úrskurð héraðsdóms í lok febrúar.

Ramos hélt því meðal annars fram að hann ætti á hættu að sæta ofsóknum af hendi fangelsisyfirvalda í Brasilíu en hann hefur gagnrýnt aðbúnað fanga þar í landi harðlega.

Allan þennan tíma hefur Ramos setið í varðhaldi og má gera ráð fyrir því að kostnaður af veru hans hér hlaupi á nokkrum milljónum fyrir íslenska ríkið. Kostnaður við flutninginn aftur til Brasilíu verður þó greiddur af þarlendum yfirvöldum að sögn Smára.